Aklım geler başıma
Sakalım biyazıyêr,
Aklım geler başıma,
Ömürün dä yaklaşêr
Yaşı otuz yaşıma.
Gölbaşı köpekleri
Sokakta boşta gezerlär,
Çünkü yoktur evleri,
Herbir ölüyä dizerlär
Gölbaşı köpekleri.
Ulumaa açan başlêêrlar,
Aaladêrlar gökleri,
Hep sürüylän uluyêrlar
Gölbaşı köpekleri.
Lafetmää sansın isteerlär
Akıllı o gözleri,
Evallaa açan gelerlär
Gölbaşı köpekleri.
Ayazdan tiken olêrlar
Siirelmiş o tüüleri,
Ama genä oynaşêrlar
Gölbaşı köpekleri.
Pençeredän hep izleerim
Kuyruklu sürüleri,
Gezsinnär hep tok, isteerim,
Gölbaşı köpekleri.
Gel denizä
Pin trenä, gel denizä,
Yosif Brodskiydän nasaat.
Bekledim kıştan beeri
Te geldi o saat.
Denizä gel dinnenmää,
Yorgunnuun ilinnesin,
Dolaşık fikirlerdän
Kafan dinnensin.
Denizä göz yaşını
Eer istärseydin katmaa,
Alatla, gel dinnenmää,
Kumnarda yatmaa.
Eer lääzımsa düşünmää,
Kafana gelsin fikir,
Dinnenmää gel, yanında
Kafanı getir.
Nicä Germaniyaya kazanca gittik
Doksanıncı yıllar pek kolay yıllar diildi, hepsi biler. İnsan, bıkıp umut etmää, ani evdä yaşamak doorulacek, biri-birinin ardına başladılar gitmää kazanca. Angısı Moskvaya, angısı Türkiyaya. Bän dä, ozamannar delikannı, ilkin gittim Ukrainaya kazanca. Odesaya yakın bir küüdä baa beklemää gittik, ani olsun birkaç kapeykacık. Çok para ödemäzdilär, ama ödeşärdilär terekäylän: kim vardı bizim küüdän birkaç kişi ‒ hepsimizä taa evä getirdiylän bir büük maşina ekin. Geçti taa birkaç yıl, da oldu bu olay, angısı taa çok genişeltti benim gorizontumu hem zenginnetti delikannılık görgümü.
Viktor Kopuşçu 