Onnarın da var hakı insancasına yaşamaa

guguşBizim maaledä yaşêêr iki yaşlı karı, Tudorka bulü hem Marinka bulü. Elbetki, onnar bana görä yaşlı sayılêr, ama, deyelim, aşaakı maaledän doksan yaşında Mita babu onnarı hiç yaşlı saymêêr. Hem herkerä, açan görer onnarı bastonnan, tühlanarak, deer:
‒ Ayıp! Genç karılar baston ellerinä almışlar. Bän onnarın yaşında elimdän kazmayı brakmazdım, ‒ hem doorusu da, ani Mita babu seksän yaşına kadar kolhozda işledi, o ihtiarlar brigadasının brigadiriydi, ‒ diil ani bastonnan gezeyim. Utanardım aul içindä dä elimä almaa.


Ama bizim maaledän karılar savaşardılar, aşaa inärkän, bastonu evdä brakmaa, Mita babuyu günaha sokmamaa deyni. Ama taa çok boş zamannarını onnar sevärdilär geçirmää bizim maaledä, onnarlan akran olacek dallı bir salkım altında. May her avşam, evä girärkän, bän görerim onnarı ikisini o salkımın altında, kimi kerä onnarın derneenä katılêr başka karılar da, ama salkım altında büük derneklär toplanêr taa çok pazarlarda ya yortularda. Hafta arası sa bulülar ikisi gam daadêrlar, alıp yannarına işini.
O hafta arası günnerdän bir gün toplanmışlar genä salkım altında, taazä kırkılmış yapaadan pıtırak ayıtlêêrlar. Tudorka bulü deer:
‒ Aman, mari, gördün mü, Amerika Siriyaya bomba atmış! Siriyayı bütünnä yakmayınca, uslanmayaceklar.
Marinka bulü Tudorka bulüylan akran, ama ondan bir klas taa az şkolaya gitmiş. Bilgileri okadar derin diil. Ama politikadan var annaması. Baktı kumasına gözlüklerin üstündän:
‒ Bän dä deerim bu sabaa, ne ölä Putin dürük. Osa te neymiş, aha. Genä başına bela.
‒ Of, hiç sölämä, avşam, açan televizorda gördüm, serţam tuttu. Bir auç kopça içtim, yataceykan. Düşümdä dä hep Asadı gördüm, nicä onu öldürerlär. Of, duyêrım, ani islää bitirmeyecek o da, Huseyn gibi.
‒ Bilmeerim, ama, bana kalsa, Putin oradaykan, bişey yapamayaceklar Asada.
Sora karıların lafı birdän geçti çobancılaa. Bu tema açıldı, çünkü yapaalar doluydu pıtıraklan. Elbetki, kabaat çobannardaydı, angıları sokmuşlar koyunnarı pıtıraklık içinä, hem dä diil bir kerä ya iki kerä. Karıların ellerindä eldiven dä vardı, ama genä dä pıtıraklar batardı.
Tudorka bulü çobannarın çalkandıı erin ortasında birdän diiştirdi plastinkayı, olmalı, taa önemni bişey geldi aklına:
‒ Putinin inauguraţiyası genä Hederlezin ertesi günü olaceymış. Prämoy transläţiya genä olacek, nicä 2012-dä. Bän ozaman bolniţada yatardım, ama kaçtım da saklı evä geldim iki saada.
‒ Vraçka bişey demedi mi? ‒ Bu tema pek meraklı diildi Marinka bulüya. O hiç gözlerini dä kaldırmadı işindän.
‒ Ne desin! Sordum, brakmadı. Çıkıpta geldim, medsestra sora söledi, o kendisi dä evä gelmiş inauguraţiyayı siiretmää.
‒ Deerlär, Putin hastaymış…
Tudorka bulünun içindän, bez-belli taa karnısından bir gülüş koptu. Karının bütün güüdesi sallandı yukarı-aşaa, o atlayan güüdedä kila da vardı. Güüsleri, omuzları, kafası eski durumuna geldiynän, o kaldırdı gözlerini Marinka bulüya:
‒ Sän, gördün mü, nicä o suya daldı kışın, Ay-Yordanda? ‒ da, beklämedään cuvabı, devam etti. ‒ Bän sana söleyecäm te ne, bizim Simu, topraa ilin olsun, açan biz evlendik onun armiyasından sora irmi beş yaşında bilä Putin kadar saalıklı diildi. Bän nekadar bolniţalarda gezdim, nekadar hasta gördüm, bilerim, nedir hastalık. Putin beni dä, seni dä geçecek, makarki bizdän çok küçük diil. Sän onun için hiç kahırlanma.
Yavaş-yavaş laf kaydı pensiya temasına, ani pensiyalar etmeer, gaz paalı, ilaçlar çok lüks oldu, küüdä yok avtobus, da ihtärlara zor bolniţaya gitmää. Ani kuvettä olannar bakêrlar, nicä cöplerini doldurmaa, çalêr hepsii, kim makar biraz bücetä yakın. Kim etişäbiler yalaa, makarki o yalacık küçücük dä olsa. Pensionerlerä dä kırıntılar kalêr.
Bıktıynan bu laflardan, angıları may herbir gün lafedilärdilär bu yaşlı salkımın gölgesindä, karılar istedilär haberlerä dönmää.
‒ Yakında iki Koreya birleşeceymiş, ‒ gülümsedi Marinka bulü.
‒ Allah versin, ama navrätli!
‒ Neçin, mari Tudora?
‒ Üst Koreyada okadar kişi büüdü kapalı rejimdä, da şindi onnara açaceklar kafesi. Düşünsänä. Bizim küçük Vani bıldır bulmuştu bir guguşçuk sokakta, taa küçük yavru, uçamardı, da koymuştu onu bir kafesä damda. Guguş kafestä büüdü, sora dedim, kolversin onu, artık büük kuş oldu, uçmaa istär. Uşak kafesi açtı, guguş istämeer çıkmaa, aldı da çıkardı onu, o geeri girdi. Ölä dä kafes içindä yaşadı, makarki kapusu hep açıktı, taa kışadan. Sora da suuk bir gecä donmuş damda, ölecenä kafes içindä kas-katı kalmıştı. Annêêrsın mı, insan da ölä. Kafestä duumuş, büümüş, sora da birdän deerlär çıksın. Nasıl çıkacek? Nereyi gidecek? Ne yapacek? Ne iyecek? Yok sanmêêrım, ani iki Koreya birleşecek.
‒ Bän sä isteerim, birleşsinnär koreeţlär. Canım acıyêr onnara. Okadar zor çeker insannar, onnarın da var hakı insancasına yaşamaa.

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s

%d такие блоггеры, как: