Eni yıla karşı — 1

OLYMPUS DIGITAL CAMERA

Traka-traka, Eni yıl,

Şarapçaa oldum mayıl,

Elimä aldım çölmää,

Başladım üz gram dökmää.

Buyurdum birkaç filcan,

Çok iş geçti aklımdan:

İnsannar, dünnä, başkan,

Komşu gitmiş kafadan.

Görüner çölmään dibi,

Ama yok ne yapayım.

Yaarın kumi gelecek,

Sırtımı çıbıklaycek,

Güdecek bana hatır,

Dökecek biraz rakı.

Bu filcan bitki olsun,

Fırında yanêr odun,

Gözlär yavaş kapanêr,

Artık dädu uyuklêêr.

Dädu uyusun uslu,

Evdä annaşmak olsun.

Ama, dädo, ol kuşku,

Var nicä gelsin komşun.

Şılêêr dışarda taa ay,

Soracek ödünç booday.

Ama komşu yaramaz,

Borç vermää ona olmaz.

Babo, bak köpek salêr!

Tokattan sıklık geler.

– Dädo, trakacı gelmiş,

Gözäl laflar getirmiş!

– Babo, giisileri sän topla,

Çabucak git, alatla,

Teldä ruba kalmasın,

Trakacılar çalmasın.

Dışarda biyaz kürtün,

Bacadan çıkêr tütün.

Trakacı türkü çalêr,

Dädunun üzü güler.

«Traka-traka, saalıcak,

Pak sucuk hem balıcak,

Bal hem saa yaa sofraya,

Somuncuk da araya.

Traka-traka, bereket,

Başçada dolu sepet,

Olmuş meyvalar aaçta,

Tatlı şıra pandalda.

Yaza var taa çok vakıt,

Birär filcan bizä akıt,

Dadalım o balandan,

Ani meteder insan.

Küüdä hepsicii biler,

Dädu Panti ne içer».

İhtiar Panti gülümseer,

Ne yapmaa, aklı erer.

– Babo, ya getir çölmää,

Trakacı isteer şarap içmää.

– Dädo, çölmään dibi boş,

Bakın, olmayın sarfoş.

Dädunun beli yufka.

Koyun baarêr ahırda…

Lääzım maazaya inmää,

Çölmecii taazelemää.

Kapuda durêr sürmä,

Fıçıyı görmesin dünnä.

Sürmedä kilit sarkêr,

Maazadan turşu kokêr.

Kilidi läzım açmaa,

Eşicää adım atmaa.

Tutêr dädunun aklı,

Anatar patta saklı.

İhtiar kafa biraz kefli,

Temin buyurmuş, belli.

Cöbä elini sokêr,

Anatar orda bulêr.

Babu da ne akıllı:

– Dädo, – deer, – sän çal sıklık.

Akıdarkan şarabı,

Mayıl etmesin dadı,

Yufkalık da basmasın,

Şarapçık aldatmasın.

– Korkma, babo, yok kahır.

Sän bak, mancayı karıştır.

Tuz-biber sän ona at,

İmektä lääm olsun dat.

Dädu maazaya iner,

Köşedä fıçı durêr.

Dädunun çemrek eli,

Dikkat bolladêêr çepi.

Akêr köpüklü balan,

Benizi sansın saman.

Çölmään aazı artık dolêr,

Fıçıyı ihtiar tıkêêr.

Dışarda hava pek suuk…

“Dädo, çık! Biz üşüdük!”

***

Destanın var devamı,

Ya kaldırın filcanı:

Cıngırdasın dolaylar,

Bayırlar hem dä yollar.

Kalmasın biri sessiz ‒

Yıl iki bin onsekiz!

Viktor Kopuşçu, Stepan Baboglu

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

w

Connecting to %s

%d такие блоггеры, как: